Abdixhiku njofton takim me diasporën kosovare në Gjermani

Ambasada gjermane rikujton ndalimin e tubimeve zgjedhore

Ambasada e Gjermanisë në Kosovë ka lëshuar një njoftim për kandidatët për kryeministër dhe subjektet politike, duke theksuar se mbajtja e tubimeve zgjedhore në territorin gjerman nuk lejohet brenda periudhës prej tre muajsh para zgjedhjeve në vendet e tyre të origjinës, përcjell albinfo.ch.

Meqenëse zgjedhjet e parakohshme në Kosovë do të zhvillohen më 28 dhjetor, kjo rregullore nënkupton se partitë kosovare nuk mund të organizojnë tubime politike në Gjermani – vend ku jeton një pjesë e madhe e diasporës kosovare.

“Duke pasur parasysh diasporën e gjerë kosovare në Gjermani, dëshirojmë t’u rikujtojmë të gjithë kandidatëve se, si rregull, ngjarjet e fushatës zgjedhore të zyrtarëve të huaj nuk lejohen në periudhën më pak se tre muaj para zgjedhjeve. Faleminderit për mirëkuptimin tuaj”, thuhet në njoftimin e ambasadës gjermane të publikuar të mërkurën.

Ky reagim vjen pak ditë pasi kandidati për kryeministër nga Lidhja Demokratike e Kosovës, Lumir Abdixhiku, kishte paralajmëruar mbajtjen e një tubimi më 13 dhjetor në Frankenthaler të Gjermanisë.

---