Abdixhiku: Nuk rrotullohet shteti për një ambicie

Kryetari i Lidhjes Demokratike të Kosovës, Lumir Abdixhiku, i ka cilësuar “për keqardhje” qëndrimet e disa deputetëve të partisë së tij ditëve të fundit.

Të martën, deputeti i LDK-së, Avdullah Hoti, kërkoi konventë të partisë për të përcaktuar “ekipin që do ta udhëhiqte LDK-në në zgjedhjet e ardhshme”.

E ditë më parë ai rekomandoi Kujtim Shalën për kryetar të LDK-së e Hykmete Bajramin për kandidate për kryeministre. Vetë Bajrami ka pranuar po ashtu se mund të jetë kandidate për kryetare në zgjedhjet e ardhshme.

Në përgjigje, Abdixhiku ka thënë se “nuk rrotullohet shteti për një ambicie”, transmeton albinfo.ch.

“Mendoja se e kanë për parime e për Kosovë; por beteja qenka për kryetar të LDK-së për njëri-tjetrin. Për keqardhje! LDK njihet ndryshe. Me klasë politike që dikur jepte gjithçka për shtetin, jo me të atillë që do ta japë shtetin për vete. Zot, fali, kaq dinë; se populli s’ka për t’i falur!” ka shkruar Abdixhiku në Facebook.

Hoti dhe Bajrami janë në mesin e 6 deputetëve kundërshtues në LDK të marrëveshjes që Abdixhiku e arriti me Vetëvendosjen për emrin e Bekim Sejdiut për president. Ata kanë thënë se nuk duan “zgjatjen e pushtetit të Albin Kurtit”.

Që nga dalja kundër, ata kanë pasur përplasje të vazhdueshme me Abdixhikun.

Abdixhiku pas zgjedhjeve të 7 qershorit u rikonfirmua në krye të LDK-së. Kuvendi i jashtëzakonshëm ia konfirmoi besimin për të udhëhequr partinë. Ai u votëbesua edhe në janar kur e kërkoi vetë votimin. Zgjedhjet e ardhshme në LDK janë të planifikuara për vitin e ardhshëm.