Abdixhiku vë në dispozicion dorëheqjen, vendimi i takon Kuvendit të LDK-së

Kryetari i Lidhjes Demokratike të Kosovës, Lumir Abdixhiku, ka deklaruar se ka ofruar dorëheqjen nga posti i tij, ndërsa vendimin përfundimtar ia ka lënë Kuvendit të partisë.

Pas një takimi maratonik që zgjati më shumë se pesë orë me drejtuesit kryesorë të LDK-së, Abdixhiku doli para mediave për të folur lidhur me rezultatin e partisë në zgjedhjet e 28 dhjetorit.

Ai bëri të ditur se fillimisht do të thirret Kryesia e LDK-së, e më pas Kuvendi i partisë, para të cilit do të paraqitet edhe dorëheqja e tij si akt i marrjes së përgjegjësisë politike. Sipas tij, Kuvendi do të jetë organi që do të vendosë për hapat e mëtejmë të partisë.

Abdixhiku theksoi se deri në mbajtjen e Kuvendit, çdo anëtar ka të drejtë të paraqesë kandidaturën për kryetar të LDK-së. Ai sqaroi gjithashtu se takimi i mbajtur sonte ishte joformal, ndërsa mbledhja zyrtare e organeve të partisë pritet të zhvillohet javën e ardhshme.