Afaristët shqiptarë në Austri takohen të shtunën, priten projekte të reja mes tyre

Anëtarët nga të gjitha degët e “Rrjetit”, të shtunën do të takohen në Groß St. Florian.

Pas kalimit të pandemisë, “Rrjeti i Bizneseve Shqiptare në Austri” po rikthehet edhe më i fort dhe më i bashkuar. Anëtarët nga të gjitha degët e “Rrjetit”, të shtunën do të takohen në  Groß St. Florian (afër qytetit Graz) për të bashkëbiseduar, shkëmbyer ide dhe ofruar njëri tjetrit kontrata pune në vlera të larta.

“Te shtunën rezervojeni për “Networking”, takim mes afaristësh, shkëmbim idesh, propozim ofertash dhe kërkesash, dhe çaste shoqërore mes shqiptarëve të suksesshëm e punëtorë, shkruan faqja e “Albanian Global Diaspora Business Network”, transmeton Albinfo Austria.

Nikoqir i këtij takimi do të jetë, Fadil Mulaj, pronar i ndërmarrjes “Fadil Bau”, që është njëra prej firmave më të suksesshme në Steiermark në fushën e ndërtimtarisë.

Edhe kryetari i “Rrjetit”, Yll Blakaj, ka ftuar të gjithë biznesmenët shqiptarë që t’i bashkohen këtij grupi afaristësh të suksesshëm në Austri.

“Me energji të reja, përgatitje për takimin e pesë degëve të Rrjetit te Austrisë i cili do të mbahet më 6 qershor në orën 13 të nikoqiri, firma “Fadil Bau”, Holzbauweg 10, 8522 Groß St. Florian.
Jeni të mirëpritur!”, ka shkruar kryetari Blakaj.

---