“Eurobondi, test i rëndësishëm për besimin e investitorëve”

Ministri i Financave dhe Ekonomisë i Shqipërisë, Arben Ahmetaj, ka deklaruar se dalja e Shqipërisë në tregjet ndërkombëtare ku synon të marrë hua deri në 500 milionë euro, përmes emetimit të Eurobondit, me afat maturimi 5-7 vjet, është një test i rëndësishëm për rritjen e besimit të investitorëve në ekonominë shqiptare.

“E rëndësishme është te besimi që kam te e ardhmja e ekonomisë. Besoj se do t’ia dalim,” ka thënë ai.

Ahmetaj shtoi se pas një jave intensive takimesh me investitorët në disa prej qendrave kryesore financiare evropiane, sot pritet finalizimi i një procesi të rëndësishëm për ekonominë dhe financat shqiptare.  

“Është e rëndësishme të themi që kemi bërë një punë të gjatë me muaj. Sot është mundësia e një transaksioni të mundshëm nga Parisi. Ka një orë që është hapur tregu me orën e Londrës. Është një ditë e ngarkuar me ankth dhe emocion”, theksoi ministri Ahmetaj.