AKR-ja shkarkon ministrin Bejtush Gashi

Bejtush Gashi bëhet ministri i katërt i shkarkuar i qeverisë Haradinaj, pasi u shkarkua nga kjo pozitë me kërkesë të partisë së tij, AKR-së.  Sekretari Organizativ i kësaj partie, Rrahim Pacolli, ka konfirmuar shkarkimin e tij.

“Ne si AKR kemi bërë kërkesë për shkarkimin e ministrit. Tash varet nëse e miraton këtë qeveria. Kjo po bëhet për shkak të performancës. Çdo ministër i AKR-së duhet të bëjë më shumë punë në të mirë të qytetarëve”, ka thënë Pacolli.

Vendin e Gashit, në krye të Ministrisë së Brendshme, pritet ta zë Ekrem Mustafa nga Ferizaj, ka konfirmuar deputeti i kësaj partie, Labinot Tahiri. Mustafa është nënkryetar i degës së AKR-së në Ferizaj.

Bejtush Gashi u emërua ministër i Brendshëm më 13 prill, pas shkarkimit të Flamur Sefajt nga kryeministri Ramush Haradinaj, pas skandalit të dëbimit të 6 shtetasve turq nga Kosova. Gashi bëhet ministri i tretë i shkarkuar nga radhët e AKR-së, pasi ishte shkarkuar edhe ministrja e Mjedisit, Albena Reshitaj.

Haradinaj gjithashtu ka vendosur që MMPH-në t’ia besoj Fatmir Matoshit i cili deri më tani roli i tij ishte Ushtrues Detyre në po të njëjtën ministri.