Akullnajat në Austri drejt zhdukjes: Ekspertët parashikojnë fundin e tyre brenda 15 viteve

(KEYSTONE/Peter Schneider)

Shkencëtarët paralajmërojnë se akullnajat austriake po humbasin masën me një shpejtësi alarmante për shkak të ngrohjes globale. Sipas glaciologut Bernhard Sagel nga Universiteti i Salzburgut, nëse procesi vazhdon me këtë ritëm, pas 10 deri në 15 vjetësh ato mund të zhduken pothuajse plotësisht.

Sagel thekson se disa akullnaja në rajonin e Salzburgut kanë humbur gjysmën e akullit vetëm në 25 vitet e fundit. Në ditët me shumë diell, një akullnajë mund të shkrijë deri në 10 cm trashësi në ditë – një humbje që kërkon rreth 10 metra dëborë të re për t’u kompensuar.

Edhe reshjet e dendura të borës në pranverë nuk kanë mundur ta ndalin këtë shkrirje masive. Shembulli më domethënës është Stubacher Sonnblick, i cili ka humbur 45 milionë metra kub akull në një çerek shekulli.

“Nëse sot shohim ende disa copa akulli, pas një dekade gjasat janë të mos ketë më akullnaja të dukshme në Austri”, paralajmëron Sagel, duke shtuar se ndikimi i efektit serë është gjithnjë e më i pamohueshëm.