Alarm në Kosovë: Mbi 30 mijë nxënës më pak në vetëm pesë vjet

Shkollat po zbrazen, Kosova humbi 30 mijë nxënës në pesë vjet

Bankat bosh në shkollat e Kosovës po bëhen gjithnjë e më shumë simbol i një realiteti shqetësues. Të dhënat tregojnë se vetëm në pesë vitet e fundit, sistemi i arsimit parauniversitar ka humbur rreth 30 mijë nxënës, ndërsa vetëm gjatë këtij viti shkollor janë regjistruar afro 5 mijë nxënës më pak krahasuar me vitin paraprak, përcjell albinfo.ch.

Rënia e vazhdueshme e numrit të nxënësve ka sjellë edhe mbylljen e disa shkollave në zonat rurale, ku mungesa e fëmijëve e ka bërë të pamundur vazhdimin e procesit mësimor.

Antropologu Tahir Latifi, në emisionin “Ora Shtatë” në Klan Kosova, tha se ndryshimet demografike kanë nisur menjëherë pas luftës së fundit në Kosovë.

“Në Kosovë ka pasur një valë të madhe të emigrimit”, u shpreh ai.

Edhe demografi Mehdi Gashi vlerëson se rënia e numrit të nxënësve është rezultat i proceseve demografike të viteve të kaluara, ndërsa efektet e tyre po ndihen tani në sistemin arsimor.

“Sipas disa parashikimeve, të cilat mund të ndryshojnë, numri i nxënësve mund të bie edhe më shumë”, tha Gashi.

Ndërkohë, gazetari Vullnet Krasniqi theksoi se, përveç faktorëve demografikë, shqetësim mbetet edhe cilësia e sistemit arsimor.

“Prej vitesh sistemi i arsimit ka mbetur i njëjtë dhe natyrisht nuk është një sistem i mirë. Shkolla ende nuk është një vend ku fëmijët shkojnë me dëshirë”, u shpreh ai.

Ekspertët vlerësojnë se rënia e natalitetit, emigrimi dhe nevoja për reforma në arsim janë sfida që do të ndikojnë edhe në vitet e ardhshme, duke ndryshuar ndjeshëm strukturën e sistemit arsimor në Kosovë. /Albinfo.ch

---