Albulena Haxhiu: Seanca konstituive e Kuvendit do të thirret brenda afatit kushtetues

Ushtruesja e detyrës së presidentes thotë se certifikimi i rezultateve hap rrugën për themelimin e institucioneve të reja

Ushtruesja e detyrës së presidentes së Kosovës, Albulena Haxhiu, ka bërë të ditur se seanca konstituive e Kuvendit do të thirret brenda afatit të përcaktuar me Kushtetutë, pas certifikimit të rezultateve përfundimtare të zgjedhjeve parlamentare të 7 qershorit, përcjell albinfo.ch.

Megjithatë, Haxhiu nuk ka bërë të ditur datën e mbajtjes së seancës. Sipas Kushtetutës së Kosovës, seanca konstituive duhet të mbahet brenda 30 ditëve nga certifikimi i rezultateve të zgjedhjeve.

“Në përputhje me përgjegjësitë kushtetuese, seanca konstituive e Kuvendit të Republikës do të thirret brenda afatit të përcaktuar me Kushtetutë, duke hapur rrugën për themelimin e institucioneve të reja të dala nga vullneti i qytetarëve”, ka shkruar Haxhiu.

Ajo e cilësoi certifikimin e rezultateve si një hap të rëndësishëm në procesin demokratik të vendit, duke theksuar se vullneti i qytetarëve, i shprehur përmes votës brenda dhe jashtë Kosovës, tashmë ka marrë formën e tij përfundimtare institucionale.

Haxhiu shprehu mirënjohje për institucionet zgjedhore dhe të gjithë ata që kontribuuan në organizimin dhe përmbylljen e procesit zgjedhor.

“Shpreh mirënjohjen time për institucionet zgjedhore dhe për të gjithë ata që, me profesionalizëm, përgjegjësi dhe përkushtim, kontribuuan në mbarëvajtjen dhe përmbylljen e këtij procesi”, u shpreh ajo.

Në fund, ushtruesja e detyrës së presidentes theksoi se besimi i qytetarëve përfaqëson një përgjegjësi të madhe për të zgjedhurit, duke nënvizuar se çdo mandat duhet të ushtrohet me integritet, llogaridhënie dhe përkushtim në shërbim të interesit publik, demokracisë dhe të ardhmes së Kosovës./Albinfo.ch

---