Albulena Uka betohet si avokate në Nju-Jork, një sukses i ri për juristen nga Kosova

E lindur në Mitrovicë dhe me karrierë të pasur akademike e institucionale, Uka vazhdon të shënojë arritje në SHBA, ku aktualisht ligjëron në Brooklyn Law School

Juristja nga Kosova, Albulena Uka, ka shënuar një tjetër sukses të rëndësishëm në karrierën e saj ndërkombëtare, duke u betuar zyrtarisht në Kushtetutën e Shteteve të Bashkuara të Amerikës për të ushtruar profesionin e avokates në Nju-Jork, transmeton albinfo.ch.

Në një reagim publik, Uka e cilësoi këtë moment si një nder të madh dhe një përgjegjësi të veçantë, duke theksuar se do ta ushtrojë profesionin me integritet dhe profesionalizëm.

 

E lindur në Mitrovicë, Albulena Uka ka nisur studimet në Fakultetin Juridik të Universitetit të Mitrovicës, ndërsa më pas ka vazhduar studimet master në të drejtën ndërkombëtare dhe evropiane në Universitetin e Ghentit, ku u diplomua me rezultate të larta “Summa Cum Laude”.

Gjatë angazhimit të saj në Kosovë, ajo ka mbajtur pozita në institucione të rëndësishme shtetërore, përfshirë Ministrinë e Drejtësisë, Gjykatën Kushtetuese dhe Ministrinë për Integrim Evropian, si dhe ka kontribuar në akademi si asistente profesoreshë.

Në nivel ndërkombëtar, Uka është angazhuar në aktivitete dhe konferenca akademike, përfshirë edhe organizime të Universitetit Harvard, duke u dalluar në fushat e sundimit të ligjit, të drejtave themelore dhe raportit ndërmjet të drejtës ndërkombëtare dhe asaj evropiane.

Aktualisht, Albulena Uka shërben si profesoreshë në Brooklyn Law School në New York, një nga institucionet më prestigjioze juridike në SHBA. Arritja e saj shihet si sukses i rëndësishëm jo vetëm personal, por edhe për diasporën akademike shqiptare./Albinfo.ch

 

Kur ëndrrat nuk njohin kufij, rrugëtimi akademik i Albulena Ukës

---