Ambasada amerikane: Familjet e viktimave të luftës meritojnë drejtësi

SHBA-ja rithekson mbështetjen për hetimin e krimeve të luftës dhe zbardhjen e fatit të viktimave

Ambasada e Shteteve të Bashkuara të Amerikës në Kosovë ka ritheksuar mbështetjen për hetimin e krimeve të luftës dhe përpjekjet që familjet e viktimave të marrin drejtësi.

Në një përgjigje për mediat në Prishtinë, Ambasada amerikane ka theksuar se vazhdon të mbështesë përpjekjet për hetimin e krimeve të kryera gjatë luftës në Kosovë, përcjell albinfo.ch.

Sipas Ambasadës, vendosja e drejtësisë për familjet e viktimave mbetet e rëndësishme, ndërsa çdo familje meriton të marrë përgjigje për fatin e të afërmve të saj.

Qëndrimi i Ambasadës vjen pas kërkesave të fundit që Serbia të hapë dokumentacionin lidhur me njësitë ushtarake që dyshohet se kanë qenë të përfshira në krimet e kryera në Kosovë gjatë luftës.

Kryeministri në detyrë i Kosovës, Albin Kurti, ka kërkuar në veçanti hapjen e dosjeve të Brigadës së 37-të të Motorizuar të ish-Ushtrisë Jugosllave, duke theksuar nevojën për zbardhjen e plotë të krimeve dhe fatit të personave të zhdukur.

 

---