Ambasadori i Kosovës në Zvicër, Mentor Latifi: Ambasada po monitoron situatën pas shpërthimit në Crans-Montana

Mbi 40 persona kanë humbur jetën dhe shumë të tjerë janë plagosur si pasojë e një shpërthimi që ndodhi në një bar në resortin e njohur të skijimit në Crans-Montana, Zvicër.

Duke pasur parasysh se një numër i madh i diasporës kosovare jeton dhe vepron në Zvicër, Klankosova kontaktuar me Ambasadën e Kosovës në Bernë për të konfirmuar nëse ka viktima apo të lënduar nga bashkëatdhetarët tanë.

Ambasadori i Kosovës në Zvicër, Mentor Latifi, deklaroi se ambasada po monitoron situatën me kujdes dhe është në kontakt të vazhdueshëm me autoritetet zvicerane.

“Në orën 17 kemi biseduar herën e fundit me linjën emergjente të policisë federale në lidhje me tragjedinë në Crans-Montana. Deri më tash nuk është bërë identifikimi i nacionalitetit të viktimave. Janë duke punuar në këtë drejtim. Edhe kur të bëhet identifikimi, së pari do të informohen familjet përkatëse, pastaj do të procedohet me informimin e publikut”, tha ambasadori.

Ai shtoi se çdo informacion i ri do të publikohet në faqen zyrtare të Facebook-ut të Ambasadës së Kosovës në Bernë.