Arrestohen dy bashkëpronarët e agjencisë turistike “Prishtina Jet”

Fluturimet nuk u realizuan asnjëherë, përkundër pagesave të bëra

Prokuroria Themelore në Prishtinë ka njoftuar se, në koordinim me Policinë e ATK-në, është realizuar një aksion në Prishtinë e Podujevë, duke arrestuar dhe dërguar në mbajtje dy bashkëpronarët e agjencisë turistike “Prishtina Jet”, M.K. dhe A.B.

Ata dyshohet se kanë mashtruar bashkatdhetarët, duke u shitur bileta fiktive për udhëtim me aeroplan nga shtetet perëndimore në Kosovë me çmime shumë më të lira se çmimi në treg. Fluturimet nuk u realizuan asnjëherë, përkundër pagesave të bëra, përcjell albinfo.ch.

“Me këtë të dëmtuarve përpos dëmeve financiare u kanë shkaktuar edhe keqtrajtime psikike, duke u maltretuar me familjarët e tyre nëpër aeroporte të ndryshme për realizimin e fluturimeve të premtuara rrejshëm nga të pandehurit. Të njëjtit me urdhër të Prokurorit të Shtetit janë dërguar në mbajtje prej 48 orësh, derisa ndaj tyre do të ndërmerren veprimet e mëtejme procedurale ligjore, si dhe veprime hetimore ndaj rastit në fjalë, deri në epilogun përfundimtar të kësaj çështje penale”, thuhet nga Prokuroria.

---