Arrestohet mërgimtari i dyshuar për kërcënimin ndaj Ramush Haradinajt

Policia e Kosovës ka arrestuar personin e dyshuar për kërcënimin ndaj deputetit Ramush Haradinaj, pas kërkesës së Prokurorisë për identifikimin e tij dhe ndërmarrjen e veprimeve ligjore.

Policia e Kosovës ka arrestuar personin e dyshuar për kërcënim ndaj deputetit dhe liderit të AAK-së, Ramush Haradinaj, transmeton albinfo.ch.

Arrestimi ka ardhur pas kërkesës së Prokurorisë që personi i dyshuar të identifikohet dhe ndaj tij të ndërmerren veprimet e nevojshme ligjore.

Lajmin për arrestimin e ka konfirmuar zëdhënësja e Policisë për rajonin e Prishtinës, Flora Ahmeti.

“Personi i dyshuar është arrestuar nga Njësiti i Hetimeve të Përgjithshme të Drejtorisë Rajonale të Policisë në Prishtinë”, ka deklaruar Ahmeti.

Rasti është duke u trajtuar nga organet kompetente, ndërsa pritet që të zhvillohen procedurat e mëtejshme ligjore ndaj të dyshuarit./Albinfo.ch

---