Arrin në Kosovë aeroplani që të shtunën bëri ulje emergjente në Beograd

Gjatë ditës së djeshme, fluturimi i planifikuar nga Hamburg për në Prishtine nga operatori ajror ‘Eurowings’ (Flt.Nr. EW5704), i nisur në ora 14:30 me 155 udhëtarë në bord, për shkaqe teknike është detyruar të aterojë në aeroportin ‘Nikola Tesla’ në Beograd në orën 16:27.

Operatori ajror Eurowings, menjëherë ka organizuar dhe ka dërguar një aeroplan alternativ (Flt. Nr. EW6005) për të marrë udhëtarët e mbetur në aeroportin e Beogradit, dhe në orën 22:56 ky aeroplan ka fluturuar me udhëtarët e njëjtë për në qytetin e Köln në Gjermani, ku ka aterruar në 00:45 pas mesnatës.

“Autoriteti i Aviacionit Civil dhe institucionet e tjera shtetërore të Kosovës, bashkë me aeroportin e Prishtinës, kanë qenë në komunikim dhe koordinim të vazhdueshëm me operatorin ajror Eurowings për sigurinë dhe mirëqenien e udhëtarëve tanë që ishin në këtë fluturim. Udhëtarët e kthyer në Köln, operatori ajror Eurowings i ka sjellë në Prishtinë paraditën e sotme, në orën 10:00 (Flt. Nr. EW6006)”, thuhet në njoftimin e aviacionit.