ATK: 177.7 milionë euro të hyra për tre muaj, apo 23.2 milionë euro më shumë se plani

pixabay

Administrata Tatimore e Kosovës ka bërë të ditur se po vazhdon me trendin rritës të mbledhjes së të hyrave për tremujorin e parë të këtij viti. Janë realizuar 177.7 milionë euro të hyra, të cilat në krahasim me planin tejkalohen pritshmëritë për 23.2 milionë euro, apo 15.1 % më shumë.

ATK thekson se rritje e konsiderueshme është shënuar edhe nëse krahasohet me periudhën e njëjtë të vitit të kaluar, ku janë inkasuar 42.9 milionë euro.

“Ndikues në rritjen e këtij niveli të të hyrave janë shumë indikatorë, siç është rritja e kontrollit të brendshëm, trajtimi i borxheve sipas reformës, intensifikimi i aktiviteteve në terren, si dhe shtrirja e projekteve, të cila kanë dhënë efektin e tyre në performancën e të hyrave tatimore, si një prej objektivave më të rëndësishme të ATK-së.

Po ashtu, bazuar në Planin Strategjik 2022-2026, i cili vë thekësin në tri qëllime strategjike, për të siguruar që ATK mund të realizojë përmirësim të qëndrueshëm për mbledhjen e të hyrave, për përmbushjen e objektivave fiskale të Qeverisë, për modernizimin e ATK-së në sistemin e procedurave tatimore, si dhe shërbimeve për tatimpaguesit”, thuhet në njoftim.