Austria dhe Gjermania bashkë në masa të reja për migracionin

EPA/FILIP SINGER

Ministri i Brendshëm austriak, Gerhard Karner (ÖVP) dhe homologu i tij gjerman, Alexander Dobrindt (CSU), u takuan këtë pasdite në Vjenë për të diskutuar mbi politikat e përbashkëta të migracionit në nivel të Bashkimit Evropian dhe çështje bilaterale. Fokus i bisedimeve ishte forcimi i kontrolleve kufitare dhe bashkëpunimi për parandalimin e migracionit të paligjshëm, shkruan ORF, transmeton albinfo.ch.

Në një konferencë të përbashkët për shtyp, Karner vlerësoi hapat e ndërmarra nga ministri i ri gjerman, i cili mori detyrën më 6 maj. Ai e përshkroi si pozitive vendimin e Gjermanisë për të refuzuar hyrjen e azilkërkuesve në kufirin austriako-gjerman, duke theksuar se kjo ka ndikuar drejtpërdrejt në uljen e numrit të arrestimeve të paligjshme në kufirin me Gjermaninë dhe sidomos në kufirin Burgenland-Hungari.

“Gjermania po dërgon një sinjal të qartë për forcimin dhe intensifikimin e kontrolleve kufitare, dhe kjo është në interes edhe të Austrisë,” u shpreh Karner. I pyetur nga gazetarët për fatin e azilkërkuesve të refuzuar nga Gjermania, ministri austriak nuk dha një përgjigje të qartë, duke mos komentuar mbi trajtimin konkret të tyre, transmeton albinfo.ch.

Nga ana tjetër, Dobrindt deklaroi se shtimi i forcave policore në kufi dhe arrestimet janë pjesë e një strategjie më të gjerë për të riformuar politikën evropiane të migracionit. Ai nënvizoi rëndësinë e interesave të përbashkëta midis Austrisë dhe Gjermanisë për sigurinë dhe përballjen me flukset e paligjshme migratore.

“Po e kthejmë politikën e migracionit në Evropë përmbys. Qëllimi ynë është të forcojmë sigurinë dhe të veprojmë në mënyrë të koordinuar kundër migracionit të paligjshëm,” tha Dobrindt, transmeton albinfo.ch.