Austria regjistron mbi 7,600 krime të urrejtjes në vitin 2024

Keystone EPA/CHRISTIAN BRUNA

Më shumë se 7,600 raste të krimeve të urrejtjes janë regjistruar në Austri gjatë vitit 2024, sipas raportit vjetor të Ministrisë së Brendshme të publikuar të martën. Raporti evidenton se motivet ideologjike, raciste dhe fetare vazhdojnë të jenë shtysat më të zakonshme për këto vepra penale, ndërkohë që një pjesë e konsiderueshme e tyre ka ndodhur në mjediset online, shkruan ORF, transmeton albinfo.ch.

Në total, janë dokumentuar 7,614 arsye për paragjykime në të gjithë vendin. Krahasuar me popullsinë, numri më i lartë i rasteve është regjistruar në Salzburg, Vjenë dhe Karinthi, ndërsa Burgenlandi ka raportuar numrin më të ulët të incidenteve.

Një e katërta e krimeve me motiv urrejtjeje ndodhi në internet, ku tre të katërtat e tyre përbëjnë shkelje të Ligjit të Ndalimit, i cili ndalon përhapjen e ideologjive ekstremiste, përfshirë glorifikimin e nazizmit. Gjithashtu, një në dy raste me motive raciste u regjistruan në hapësirat online.

Ndër postimet me përmbajtje antifetare, dy të tretat ishin antisemite, ndërsa një e treta antimuslimane.

Sipas të dhënave, motivi më i zakonshëm për krimet e urrejtjes ishte ideologjia apo botëkuptimi politik, me 3,935 raste të dokumentuara – një rritje prej 45% krahasuar me një vit më parë, transmeton albinfo.ch.

Pas saj renditen origjina kombëtare ose etnike (1,581 raste), feja (763 raste), ngjyra e lëkurës (417 raste), orientimi seksual (317 raste, një ulje prej 29% nga viti 2023), gjinia (238 raste), statusi shoqëror (136 raste), aftësitë e kufizuara (125 raste), mosha (102 raste).

Vepra penale më e shpeshtë ishte shkelja e Ligjit të Ndalimit, me 2,952 raste, e ndjekur nga dëmtimi i pronës (1,396 raste), dëmtimet trupore (661 raste), nxitja e urrejtjes (599 raste), kërcënime të rrezikshme (506 raste).

Gjithsej 1,619 persona u identifikuan si viktima të krimeve të dhunshme me motive urrejtjeje, ku 63% ishin burra. Motivi më i zakonshëm ndaj viktimave ishte origjina kombëtare ose etnike.

Raporti tregon se 86% e të dyshuarve për krime të urrejtjes ishin burra, përqindje më e lartë se në rastet e tjera të krimit të përgjithshëm (78%). Po ashtu, numri i të miturve të përfshirë në këto raste ishte më i lartë në raport me grupmoshat e tjera.

Pjesa më e madhe e të dyshuarve ishin shtetas austriakë (74%). Për shembull, në tre nga pesë raste me motive mizogjine, të dyshuarit ishin austriakë. Shtetasit e huaj përbënin vetëm 26% të të dyshuarve në krimet e urrejtjes – më pak sesa në krimin e përgjithshëm (47%).

Austria ka nisur të regjistrojë veçmas krimet e urrejtjes që nga viti 2020, ndërsa raporti vjetor publikohet rregullisht nga viti 2022. Të dhënat përfshijnë vetëm rastet për të cilat janë përfunduar hetimet policore. Sipas Ministrisë së Brendshme, shkalla e sqarimit për krimet e urrejtjes mbetet 67%, e pandryshuar nga vitet e kaluara, transmeton albinfo.ch.