Bankat zvicerane zbulojnë se si bëhet shpëlarja e parave

Bankat zvicerane janë të gatshme që Departamentit amerikan të Drejtësisë t’i zbulojë se si i kanë ndihmuar klientët për të fshehur paratë dhe për të shmangur pagimin e taksave, shkruan “Bloomberg”, transmeton albinfo.ch.

Këtë vit një marrëveshje ishte nënshkruar në mes të Departamentit amerikan të Drejtësisë dhe 41 bankave zvicerane, të cilat janë të obliguara për të zbuluar se si i kanë ndihmuar klientët në fshehjen e parave, cilët bankierë janë përgjegjës, ndërmjetës, si dhe si kanë lëvizur rrjedhat e parave.

Ky informacion do të ndihmojë ekspertët amerikanë për të filluar një hetim kundër personave dhe institucioneve të përfshira në pastrimin e parave edhe në vende të tjera, dhe objektivat e mundshme janë bankat në Izrael dhe Singapor.

“Paratë nga Zvicra shkojnë në vende të ndryshme”, tha hetuesja amerikane, Carolina Chiraolo.

Bashkëpunimi i parë i drejtësisë amerikane me bankat zvicerane ka filluar në vitin 2009, pasi UBS ka paguar një gjobë prej 782 milionë dollarësh për shkak se kishte ndihmuar evazionin fiskal dhe pastaj ishte iniciuar hetimi i 14 bankave të tjera.