Bashkëpunimi Kosovë-Hungari në qendër të takimit presidencial

Në një takim në Presidencë dhe me pritje ceremoniale shtetërore Presidentja e Republikës së Kosovës, Vjosa Osmani dhe zotëriu i Parë Prindon Sadriu, mirëpritën sot Presidentin e Hungarisë, Tamás Sulyok, dhe Zonjën e Parë të Hungarisë, Zsuzsanna Nagy, në vizitën e tyre të parë zyrtare në Kosovë.

Gjatë takimit, Presidentja Osmani nënvizoi synimin për të forcuar bashkëpunimin mes Kosovës dhe Hungarisë në të gjitha fushat dhe theksoi rëndësinë e mbështetjes hungareze për heqjen e masave të padrejta nga Bashkimi Evropian. Ajo shtoi se integrimi euro-atlantik i Kosovës është një interes strategjik jo vetëm për vendin, por edhe për stabilitetin rajonal dhe të gjithë Evropën, transmeton albinfo.ch.

Vizita e Presidentit Sulyok shënon një moment të rëndësishëm në marrëdhëniet dypalëshe dhe hap rrugën për bashkëpunim më të ngushtë mes dy vendeve në të ardhmen.