Irlanda, e cila mban presidencën e radhës të Bashkimit Evropian, ka propozuar shkurtimin me 141 miliardë euro të projektbuxhetit për periudhën 2028–2034. Synimi është arritja e një marrëveshjeje deri në fund të vitit, mes ndarjeve të thella për nivelin e shpenzimeve, raporton AFP, sipas The Local, transmeton albinfo.ch.
Propozimi përfaqëson një ulje prej rreth 8 për qind ndaj planit fillestar, me llogaritje sipas çmimeve të vitit 2025. Megjithatë, buxheti do të mbetej dukshëm më i madh se ai i mëparshmi, me vlerë rreth 1,2 trilionë euro.
Gjermania, së bashku me Austrinë, Danimarkën, Finlandën, Holandën dhe Suedinë, kërkon shkurtime më të mëdha. Kancelari Friedrich Merz deklaroi se propozimi i ri ende nuk ofron bazë për marrëveshje dhe se buxheti duhet të jetë i përballueshëm për vendet që mbajnë barrën kryesore të financimit.
Në anën tjetër, eurodeputetët vlerësojnë se shkurtimet shkojnë tepër larg. Franca argumenton se BE-së i duhen mjete të mjaftueshme për të mbështetur bujqësinë dhe konkurrueshmërinë e ekonomisë evropiane.
Sipas draftit, ndihma ndërkombëtare do të pësonte uljen më të madhe, prej 17 për qind. Shpenzimet për konkurrueshmërinë ekonomike do të reduktoheshin me rreth 13 për qind, administrata me 12 për qind, ndërsa bujqësia dhe zhvillimi rajonal me nga 3 për qind.
Debati përfshin edhe burime të reja të ardhurash. Komisioni Evropian ka propozuar taksa për kompanitë e mëdha, mbetjet elektronike dhe duhanin. Sipas presidencës irlandeze, masat e draftit të saj do të siguronin rreth 55 miliardë euro në vit.
Udhëheqësit e vendeve anëtare pritet ta diskutojnë planin në Bruksel javën e ardhshme. Shqetësimi është se shtyrja e negociatave në vitin zgjedhor 2027 mund ta vështirësojë më tej kompromisin.
