BE-ja reagon ndaj mohimit të Vuçiqit për krimet në Reçak

Deklarata e djeshme e Vuçiqit bëri bujë edhe në botë, sipas së cilës masakra në Reçak ishte improvizm dhe jo e vërtetë.

Nga kjo deklaratë mohuese reaguan menjëherë institucionet e Kosovës, e po ashtu edhe Bashkimi Evropian ka përsëritur qëndrimin se nuk ka vend për t’i mohuar apo për t’i relativizuar ngjarjet në Reçak të vitit 1999, dhe se mohimi dhe revizionizmi shkojnë kundër vlerave të Bashkimit Evropian dhe kundër projektit të integrimit të Ballkanit Perëndimor në Bashkimin Evropian.

Është bërë e ditur se këtë qëndrim të BE-së e ka shpërndarë Ana Pisonero, zëdhënësja e re e Komisionit Evropian për çështje të fqinjësisë dhe zgjerimit.

Por nga përmbajtja shihet se ky është qëndrim i përgatitur mirë nga shërbimet e Komisionit Evropian, sepse i njëjti qëndrim është dhënë edhe në muajin prill të këtij viti, përcjell albinfo.ch.