BE pranon certifikatat anti-Covid të Shqipërisë

Bashkimi Evropian ka aprovuar certifikatat shqiptare të vaksinimit anti-Covid. Kryeministri i Shqipërisë, Edi Rama, në reagimin e tij pas pranimit të certifikatës shqiptare nga BE-ja ka shkruar se ky është një shembull kuptimplotë i progresit digjital të Shqipërisë.

“SUPERLAJM. Shqiptarët të lirë të lëvizin në Europë me pasaportën digjitale të vaksinimit. BE aprovon Shqipërinë, Izraelin dhe Marokun, duke dhënë edhe një shembull kuptimplotë të progresit tonë digjital, për të gjithë ata që dëshirojnë t’u gëzohen edhe arritjeve, përveçse të shohin vetëm të këqija deri edhe ku nuk ka”, ka shkruar Rama, transmeton Albinfo.ch.

Pranimi i certifikatave anti-Covid nënkupton që dokumentet e lëshuara nga autoritetet shqiptare që vërtetojnë vaksinimin, testet apo shërimin nga koronavirusi do të njihen në të gjitha vendet anëtare të BE-së.