Begaj: Ndërhyrja e NATO-s i dha fund gjenocidit serb në Kosovë

Presidenti i Shqipërisë, Bajram Begaj, ka kujtuar 25-vjetorin e nisjes së bombardimeve të NATO-s kundër caqeve serbe.

Ai shkruan se NATO ndërhyri për t’i dhënë fund gjenocidit serb në Kosovë.

“Faleminderit, NATO! Faleminderit, SHBA! 25 vjet më parë, më 24 mars 1999, NATO ndërhyri për t’i dhënë fund gjenocidit serb në Kosovë. Sot ne përkujtojmë një ngjarje me rëndësi historike për Kosovën dhe të gjithë shqiptarët. Ndërhyrja e NATO-s, e udhëhequr nga SHBA-ja, i dha të drejtë kauzës së lartë të popullit të Kosovës dhe përpjekjeve për liri e pavarësi. Urtësia politike, largpamësia strategjike dhe vendosmëria e Aleancës për të mos qëndruar indiferente ndaj spastrimit etnik dhe dhunës jo vetëm e shpëtuan Kosovën, por krijuan një kornizë të re të sigurisë për gjithë rajonin”, shkroi Begaj.

Ai shton se “në sajë të kësaj ndërhyrjeje, brenda pak kohe u mundësua pavarësimi dhe krijimi i Republikës së Kosovës, një histori suksesi e shtetndërtimit demokratik”.

Begaj tutje u shpreh se prania e NATO-s në Kosovë nëpërmjet trupave të KFOR-it vijon të luajë një rol të rëndësishëm në sigurinë e paqes dhe stabilitetit në rajonin tonë dhe se ky akt historik i NATO-s të kujtojë si “nuk duhet t’i ndalim përpjekjet tona për të krijuar një rajon që rrezaton harmoni, bashkëpunim dhe prosperitet”.