Berna ndalon pushimet për të burgosurit e rrezikshëm

Ky vendim vjen si rezultat i frikës nga përsëritja e rasteve sikur ai i fundit i ikjes nga burgu St. Gorgon i Neushatelit

Pas rastit të ikjes para dy javësh nga burgu të një të dënuari për vrasje dhe dhunim, i cili gjendej në shëtitje, në burgjet zvicerane kanë filluar të rishqyrtohen masat e sigurisë.

Kështu, kantoni i Bernës ka vendosur që të burgosurve që cilësohen si të rrezikshëm t`u ndalohen pushimet apo daljet në shëtitje jashtë burgut me shoqërues nga burgu. Vendimi hyn në fuqi menjëherë, shkruan drs.ch.

Drejtori i policisë së kantonit të Bernës Jürg Käser ka pranuar se ky vendim vjen si rezultat i frikës nga përsëritja e rasteve sikur ai i fundit i ikjes nga burgu St. Gorgon i Neushatelit, i cili dënimin e kishte marrë në kantonin e Bernës.

Käser dhe qeveria e kantonit të Bernës angazhohen për një praktikë të përbashkët, unike të masave ndëshkuese në burgjet zvicerane. Dhe kjo mund të realizohet më shpejt përmes një marrëveshjeje në mes të kantoneve se sa përmes një ligji federal, ka thënë Käser.