Bie numri i viktimave në komunikacion

Edhe vitin e kaluar ka pasur rënie të numrit të viktimave krahasuar me vitin paraprak, që tregon përmirësim të sigurisë në trafik

Gjatë vitit 2011 në rrugët e Zvicrës është shënuar një rënie e vogël e numrit të të vdekurve nga aksidentet. Nga 327 sa kanë qenë në vitin 2010, një vit më vonë kanë vdekur në trafik 320 persona, njofton Zyra Federale për rrugët ASTRA.

Duhet përkujtuar se edhe në vitin e kaluar ka pasur rënie të numrit të viktimave krahasuar me vitin paraprak, gjë që shihet si një trend drejt përmirësimit të sigurisë në komunikacion.

Edhe numri i personave që kanë pësuar lëndime të rënda nga aksidentet në komunikacion ka shënuar rënie. Gjatë vitit 2011 janë lënduar rëndë 4437 persona që është për 21 veta më pak se një vit më parë.

Është zvogëluar po ashtu edhe numri i këmbësorëve që kanë vdekur në komunikacion, nga 75 vitin 2010, 69 në vitin 2011.

Por, vitin e kaluar ka pasur një rritje të theksuar të numrit të personave që kanë humbur jetën gjatë kalimit të brezit për këmbësorë (zebra) dhe i çiklistëve. Kështu, në zebra kanë vdekur nga goditjet e automjeteve 28 persona (në vitin 2010 ishin 20). Ndërsa në rrugë kane vdekur 39 ngasës të biçikletave që është për 5 më shumë se në vitin 2010.

Gjithsej gjatë vitit 2011 në rrugët e Zvicrës kanë ndodhur 18990 aksidente me lëndime të shkallëve të ndryshme dhe me të vdekur.