Broshurë informative për refugjatët e pranuar dhe ata me F

Sekretariati Federal për Migracion (SEM) ka publikuar një broshurë informative për refugjatët dhe ata me status të përkohshëm. Broshura e re u dedikohet personave të cilëve u është njohur statusi i refugjatit dhe atyre që kanë marrë qëndrimin e përkohshëm (viza F). Të gjithë këtyre u jepet kjo broshurë në momentin kur u vjen vendimi për statusin e tyre të ardhshëm.

Aty janë përshkruar të gjitha të drejtat dhe detyrimet që ata kanë gjatë qëndrimit të tyre në Zvicër, bën të ditur SEM në një njoftim për shtyp. Broshura e zëvendëson fletëpalosjen e cila u është shpërndarë deri tash personave të përmendur.

Broshura informon në mënyrë të thukët dhe me gjuhën më të thjeshtë të mundshme lidhur me temat si statusi, të drejtat bazë, dokumentet e identifikimit për të huajt, shkollën, vendbanimin, ndërrimin e kantonit, udhëtimet jashtë vendit, punën, kualifikimin profesional, shëndetësinë, sigurimet sociale dhe ndihmat sociale.

Broshura është shtypur në 12 gjuhë të ndryshme dhe është në dispozicion në faqen e internetit të SEM.