Burgim të përjetshëm për dy terroristët e “Banjskës”, 30 vjet për të tretin

Gjykata Themelore në Prishtinë shpalli aktgjykimin ndaj Spasojeviq, Toliq dhe Maksimoviq

Kosovë- Gjykata Themelore në Prishtinë ka shpallur aktgjykimin ndaj tre të akuzuarve për sulmin terrorist në Banjskë, duke dënuar me burgim të përjetshëm Blagoje Spasojeviq dhe Vladimir Toliq, ndërsa Dushan Maksimoviq është dënuar me 30 vjet burgim, përcjell albinfo.ch.

Sipas raportimeve, Spasojeviq dhe Toliq nuk kanë qenë prezent në shpalljen e aktgjykimit, ndërsa Maksimoviq ka qenë i pranishëm në sallën e gjyqit.

Të tre të dënuarit janë në mesin e 42 personave të akuzuar për këtë rast.

Sulmi terrorist në Banjskë ndodhi më 24 shtator 2023, kur një grup i armatosur serbësh me armatim të rëndë bllokoi fillimisht urën në fshatin Banjskë të Zveçanit, dhe më pas sulmoi zyrtarët policorë që kishin shkuar në vendngjarje për të larguar një kamion të vendosur në rrugë.

Gjatë sulmit, u vra rreshteri policor Afrim Bunjaku, ndërsa u plagosën edhe dy zyrtarë të tjerë policorë.

Rasti “Banjska” konsiderohet një nga sulmet më të rënda ndaj institucioneve të sigurisë së Kosovës në vitet e fundit./Albinfo.ch

---