Çitaku i drejtohet Kurtit: “Amater e i padijshëm”

Nënkryetarja e PDK-së, Vlora Çitaku, ka thënë se kryeministri i Kosovës, Albin Kurti, duhet të sqarojë se si ka shkuar procesi i dialogut deri në atë pikë sa aleatët tanë tani po thonë se nuk është koha për njohje reciproke, përcjell albinfo.ch.

Çitaku këtë reagim e ka bërë referuar një deklarate të ambasadorit amerikan në Kosovë, Jeff Hovenier, i cili tha se  “Përderisa qëllimi i fundëm ishte njohja reciproke ndërmjet Kosovës dhe Serbisë, e cila për fat të keq tani nuk është e mundur, sfidat e sotme ende mund të tejkalohen”.

Një marrëveshje gjithëpërfshirëse pa njohjen reciproke nuk është as finale e as gjithëpërfshirëse.

Kryeministri duhet të na e sqarojë se si qenka katandisur procesi deri në atë pikë sa aleatët tanë po thonë tani që nuk është koha për njohje reciproke?

Duhet të jesh tejmase amater e i padijshëm që në kontekstin gjeopolitik më të favorshëm për Kosovën në 15 vjetët e fundit, në vend të marrëveshjes për njohje, të kemi një status quo të re, pa njohje dhe me asociacion.

Ja gjenialiteti i Kryeministrit”, shkruan Çitaku ndër të tjera.

Ajo edhe dje në një prononcim për Gazetën Online Reporteri.net tha se faji është tek politika e papërgjegjshme e Qeverisë dhe Presidencës.

“Qeveria dhe Presidentja duhet të sqarojnë se si kemi arritur në këtë situatë. Politika e papërgjegjeshme dhe amatoreske ka pasoja. Kjo duket të jetë një nga to”, tha dje Çitaku.

Një reagim dje gjatë ditës pati edhe nga ish-kryeministri i Kosovës, Avdullah Hoti, i cili tha se Qeveria duhet t’i tregojë popullit se ka katandisur punën që e kanë bërë ShBA-të të deklarojnë se nuk është është koha për njohje nga Serbia.

“Qeveritarët duhet t’i tregojnë popullit ku e kanë katandisur punën që e ka shtyrë SHBA-në — aleatin kryesor të Kosovës — të deklarojë se nuk është koha për njohje nga Serbia. Çfarë ka ndodhur në marrëdhëniet e Kosovës me SHBA-në që njohja reciproke nuk është më në qendër”, tha Hoti.