Cyrihu u ofron nga 500 CHF për person ukrainasve që duan të kthehen në atdhe

Ndërkohë, në kantonin e Cyrihut tashmë janë të punësuar 1000 refugjatë. Një muaj më parë ishin ende rreth 650

Aktualisht janë rreth 10,400 njerëz nga Ukraina me statusin e mbrojtjes S në kantonin e Cyrihut, ka bërë të ditur për mediat drejtori i sigurisë i këtij kantoni, Mario Fehr, transmeton albinfo.ch. Ky status atyre u skadon në mars të vitit 2023.

Qeveria Federale duhet të mendojë në kohën e duhur se si do të vazhdojë më tutje, është shprehur Fehr.

Deri në 80 për qind e njerëzve nga Ukraina deri më tani janë akomoduar privatisht, tha Jörg Kündig, kryetar i Shoqatës së Këshillave Komunal, shkruan srf.ch.

Në qytetin e Cyrihut të strehuar privatisht janë madje 90 për qind e personave me statusin S, ka thënë këshilltari i qytetit, Raphael Golta.

Janë duke u zhvilluar planet për akomodim afatgjatë dhe po ashtu mund të merren në konsideratë edhe “fshatrat me kontejnerë”. Detajet do të komunikohen në vjeshtë.

Numri i lejeve të punës që u jepen njerëzve që kërkojnë mbrojtje nga Ukraina është rritur ndjeshëm javët e fundit. Në kantonin e Cyrihut tashmë janë të punësuar 1000 refugjatë, përcjell albinfo.ch. Një muaj më parë ishin ende rreth 650.

Në shumicën e rasteve bëhet fjalë për marrëdhënie normale pune, një pjesë e vogël e lejeve të punës kanë të bëjnë me praktikën për të filluar karrierën, njofton Zyra për Ekonomi dhe Punë (AWA).

---