Detaje të reja nga plagosja në Podujevë

Foto sc fb

Prokuroria Themelore në Prishtinë ka dalë me detaje të reja lidhur me plagosjen e sotme në sheshin “Bulevardi i Dëshmorëve” në Podujevë.

Raportohet se gjendja e të plagosurve është e rëndë, por stabile, teksa në njoftimin e Prokurorisë thuhet se hetimet tregojnë se të dyshuarit kanë lidhje familjare, konkretisht bëhet fjalë për nip dhe dajë, ndërsa motivi i dyshuar i përleshjes lidhet me një mosmarrëveshje të mëhershme.

Sipas Prokurorisë, personat e përfshirë dyshohen për kryerjen e veprës penale “Vrasja e rëndë në tentativë”.

“Prokuroria Themelore në Prishtinë, në koordinim të plotë më Policinë e Kosovës, është duke vazhduar ndërmarrjen e të gjitha veprimeve të nevojshme hetimore për zbardhjen e plotë të rrethanave të kësaj ngjarje”, thuhet në njoftim, transmeton albinfo.ch.

Ndryshe, më herët, Basri Shabani, nënkolonel në Drejtorinë Rajonale të Policisë në Prishtinë, ka bërë të ditur se katër persona kanë mbetur të plagosur nga incidenti me armë zjarri që ndodhi në Podujevë. Sipas tij, tre prej të plagosurve janë familjarë të përfshirë në ngjarje, ndërsa personi i katërt është një kalimtar i rastit, i cili ndodhet jashtë rrezikut për jetën.