Diaspora shqiptare jep një kontribut të çmuar në ruajtjen e gjuhës amtare

Nëntori është muaji shënjues i gjuhës shqipe. Diaspora shqiptare përgjatë historisë së saj ka dhënë e jep një kontribut të çmuar në ruajtjen e gjuhës amtare, kulturës shqiptare dhe identitetit kombëtar, shkruan albinfo.ch.

Autorë, gazetarë, profesorë e akademikë janë bërë dhe janë zëri shqip kudo në botë.

Para se të jetë muaji i festave të mëdha të pavarësisë dhe të çlirimit të Shqipërisë, është Muaji i Kongresit të Manastirit që shpalli pavarësinë kulturore të kombit shqiptar përmes vendimit për alfabetin e gjuhës shqipe dhe Muaji i Kongresit të Drejtshkrimit, që 50 vjet më parë vendosi se cila do të ishte gjuha standarde e njësuar e përbashkuese e shqiptarëve.