Ditë zie në Kosovë për ish-presidentin amerikan George H. W. Bush

Presidenti i Republikës së Kosovës, Hashim Thaçi, pas vdekjes së ish-Presidentit të Shteteve të Bashkuara të Amerikës, George H. W. Bush, në shenjë respekti shtetëror dhe qytetar për kontributin e tij të dhënë për lirinë e Kosovës, ditën e mërkurë (5 dhjetor 2018), e ka shpallur ditë zie shtetërore në Republikën e Kosovës.

Në ditën e zisë, flamuri shtetëror i Republikës së Kosovës do të ngrihet në gjysmështizë në të gjitha objektet shtetërore të Republikës së Kosovës, brenda dhe jashtë vendit.

Dita e mërkurë është shpallur ditë zie kombëtare edhe në Shtetet e Bashkuara të Amerikës.

Ministri i Arsimit Shkencës dhe Teknologjisë, Shyqiri Bytyqi, ka vendosur që me datë 5 dhjetor në gjitha institucionet arsimore para universitare, ora e parë t’i kushtohet raporteve të mira historike mes Kosovës dhe SHBA-së.

Ky vendim erdhi në nderim të jetës dhe veprës së ish presidentit të SHBA-ve, George H.W.Bush, i cili ndërroi jetë të shtunën.

Bush ishte angazhuar çdo herë për ngritjen e çështjes së Kosovës, në momente historike.

Ai gjithashtu bëri shumë në drejtim të forcimit të raporteve mes SHBA-ve dhe Kosovës, shkruan i pari i Arsimit në Kosovë.