Dyshohet për evazion fiskal – arrestohet shefi i kompanisë ajrore GP Aviation

Foto: Sven Thomann

Themeluesi i kompanisë ajrore GP Aviation, e njohur për fluturimet ndërmjet Kosovës dhe vendeve evropiane, është arrestuar nën dyshimet për mashtrim tatimor në Gjermani, raportojnë mediat zvicerane.

Sipas “Aero Telegraph”, shefi me rrënjë zvicerano-italiane u ndalua më 15 prill në kufirin mes Maqedonisë së Veriut dhe Bullgarisë, pas një urdhër-arresti ndërkombëtar të lëshuar nga autoritetet gjermane në janar të këtij viti.

Prokuroria gjermane e akuzon shefin e GP Aviation se nuk ka paguar si duhet taksat e trafikut ajror, duke shkaktuar një dëm prej të paktën 9 milionë eurosh  (8,2 milionë franga), shkruan albinfo.ch.

Sipas raportimeve të mediave zvicerane që i sjellin nga Bullgaria, i dyshuari ka pranuar ekstradimin dhe tashmë është transferuar në Gjermani. Dokumente të cituara nga portali bullgar “Dir” tregojnë se ai dyshohet për rreth 50 shkelje ligjore gjatë periudhës 2021–2025.

Kompania me seli në Sofje prezantohet si kompani ajrore me menaxhim zviceran, pasi një pjesë e funksioneve kryesore të saj zhvillohen në Cyrih. GP Aviation operon kryesisht linja që lidhin Kosovën me Gjermaninë, Zvicrën dhe vende të tjera evropiane, duke u fokusuar te diaspora shqiptare.

Flota e kompanisë përfshin tre avionë Boeing 737-400 dhe disa avionë të marrë me qira operative.

Sipas “Aero Telegraph”, në Gjermani kompanitë ajrore janë vetë përgjegjëse për deklarimin dhe pagesën e taksave të trafikut ajror. Autoritetet ende nuk kanë bërë të ditur se si dyshohet të jetë realizuar shmangia e këtyre detyrimeve.

Ndaj të arrestuarit vazhdon të vlejë prezumimi i pafajësisë.