E konfirmon Borrell: Kurti e Vuçiq takohen më 18 gusht

Takimi vjen pas tensioneve që u ngritën në veri të vendit

Kryeministri i Kosovës Albin Kurti dhe presidenti i Serbisë, Aleksander Vuçiq do të takohen më 18 gusht në Bruksel. Konfirmimin zyrtar e ka bërë Përfaqësuesi i Lartë i Bashkimit Evropian për Marrëdhëniet e Jashtme dhe Politikat e Sigurisë, Josep Borrell, i cili ka thënë se edhe ai do të jetë i pranishëm në takim, raporton Albinfo.ch.

“Kam ftuar presidentin e Serbisë, Aleksandar Vuçiq dhe kryeministrin e Kosovës, Albin Kurtin, më 18 gusht në Bruksel, për të diskutuar rrugën përpara ndërmjet Prishtinës dhe Beogradit”, ka shkruar Borrell në Tuitter.

Takimi vjen pas tensioneve që u ngritën në veri të vendit, pasi qeveria e Kosovës vendosi reciprocitet për targat dhe dokumentet serbe.

Serbët lokalë vendosën barrikada dhe bllokuan rrugët që çonin në dy pikat kufitare me Serbinë, Jarinjë dhe Bërnjak.

Pas kërkesës së ambasadorit amerikan, Jeff Hovenier, reciprociteti u shty për një muaj nga ana e ekzekutivit, kur edhe u hoqën të gjitha barrikadat nga serbët lokalë./Albinfo.ch/

---