Edhe sa do të jenë të mbyllura stadiumet për tifozë dhe sallat e koncerteve

Sallat e spektakleve dhe stadiumet janë mbyllur që prej mesit të muajit mars në mbarë Gjermaninë

Amatorët e futbollit apo koncerteve mund të privohen nga spektaklet e tyre të preferuara edhe për një vit e gjysmë në skenarin më të keq, sipas presidentit të Akademisë Kombëtare të Shkencave.

“Mbajtja mbyllur e stadiumeve dhe sallave të koncerteve edhe për 18 muaj do të ishte sigurisht diçka e menduar”, deklaroi Gerald Haug, president i Akademisë së Shkencave Leopoldina, mendimi i të cilës merret nga qeveria për të vendosur mbi masat për luftën kundër pandemisë së koronavirusit të ri.

“Përsa i përket kohës nëse kjo do të zgjasë një vit e gjysmë, duhet të presim, ka zhvillime shumë optimiste”, theksoi ai në një intervistë për stacionin publik gjerman, ARD, transmeton ATSH.

“Por kjo do të zgjasë edhe disa muaj, mund të shkohë deri në një vit e gjysmë”, shtoi ai, përcjell albinfo.ch.

Dje, Akademia kërkoi një rikthim gradual në normalitet nëse shifrat e kontaminimeve të reja stabilizohen në një nivel të ulët dhe nëse vazhdojnë masat e higjenës.

 

---