Edhe të rinjtë rrezikohen nga bixhozi

Lojërat në kumar (bixhoz) prekin edhe adoleshentët. Një studim tregon se 37 % e rinjve të Neuchâtelit të moshës 15-18 vjeç kanë luajtur bixhoz në 12 muajt e fundit. Rreth 5.6 % e tyre janë “në rrezik”, ose kanë sjellje “problematike”.

“Këto raste lidhur me kumar të tepruar nuk janë të izoluara. Ato janë të lidhura me konsumin e substancave, siç është alkooli, duhani, kanabisi si dhe një përdorim problematik i internetit”, theksoi të martën Joan-Carles Suris nga Instituti Universitar i Mjekësisë Sociale dhe parandaluese në CHUV, Lausanne.

Djemtë, më shumë të prekur

Sipas autorit të studimit, disa nëngrupe të adoleshentëve janë veçanërisht në rrezik: djemtë (sepse vajzat janë shumë pak të prekura nga ky fenomen), nxënësit në trajnim për zanat (shumë më tepër se studentët) si dhe të rinjtë që nuk kanë lindur në Zvicër.

Specialistët këshillojnë që familjet të vetëdijesohen me faktin se lojërat e bixhozit përbëjnë një problem të rëndësishëm. “Prindërit rrallë ose kurrë nuk mendojnë se bixhozi përbën një sjellje të rrezikshme”, vëren autori.

Studimi përfshin 1.102 të rinj të Neuchâtel-it në zanat, apo studentë të vitit të parë apo të dytë.