Emisari Manuel Sarrazin, sot në Prishtinë

Sot dhe nesër në Kosovë do të mbahet Forumi i Dytë Gjermano-Kosovar, njofton Oda Ekonomike Gjermano-Kosovar, përcjell albinfo.ch.

Në këtë forum pjesëmarrës do të jenë kryeministri i Kosovës, Albin Kurti, zëvendëskryeministri i Kosovës Besnik Bislimi, Ambasadori gjerman, Jörn Rohde, i dërguari i posaçëm i Gjermanisë për Ballkanin Perëndimor, Manuel Sarrazin, si dhe deputeti i Bundestagut, Peter Beyer.

“Me mbi 500 pjesëmarrës, ngjarja premton të jetë më e madhja në Kosovë… Forumi do të mirëpresë përfaqësues të njohur nga kompanitë gjermane dhe jo vetëm. Panele të nivelit të lartë, përfshirë përfaqësues nga Ministria Federale për Çështje Ekonomike dhe Veprim Klimatik (BMËK) dhe liderë të kompanive gjermane do të diskutojnë zgjidhjet për energjinë, teknologjinë dhe industrinë. Forumi Ekonomik Gjermano-Kosovar i vitit 2022 i solli Kosovës një investim prej 20 milionë euro në sektorin e prodhimit. Forumi i këtij viti synon të forcojë lidhjet ekonomike mes dy vendeve dhe të krijojë mundësi të reja bashkëpunimi”, thuhet në njoftim.