Evropa po përballet me mungesë punëtorësh

46 për qind e kompanive raportojnë vështirësi në gjetjen e stafit të kualifikuar

Pothuajse gjysma e ndërmarrjeve të vogla dhe të mesme në Bashkimin Evropian po hasin vështirësi serioze në gjetjen e punëtorëve me aftësitë e nevojshme, ndërsa procesi i rekrutimit të punëtorëve nga vendet jashtë BE-së vazhdon të mbetet i ndërlikuar dhe burokratik.

Sipas një sondazhi të ri të Eurobarometrit, 46 për qind e kompanive raportojnë vështirësi në gjetjen e stafit të kualifikuar. Megjithatë, vetëm 14 për qind e tyre kanë tentuar të punësojnë punëtorë nga vende joanëtare të BE-së gjatë dy viteve të fundit.

Komisioni Evropian paralajmëron se mungesa e fuqisë punëtore po prek një numër të madh sektorësh ekonomikë dhe se pothuajse 84 për qind e profesioneve ishin në mungesë në të paktën një shtet anëtar gjatë vitit 2023.

Ndër kompanitë që kanë provuar të rekrutojnë jashtë BE-së, më shumë se gjysma e përshkruajnë procesin si të vështirë. Pengesat kryesore janë procedurat komplekse të emigracionit dhe lejeve të punës, vështirësitë në gjetjen e kandidatëve të përshtatshëm dhe barrierat gjuhësore, transmeton albinfo.ch.

Situata ndryshon dukshëm nga një shtet në tjetrin. Në Gjermani rreth një e katërta e ndërmarrjeve kanë tentuar të punësojnë punëtorë nga jashtë BE-së, ndërsa në Maltë kjo shifër arrin në 48 për qind. Në vende të tjera si Franca, Suedia dhe Hungaria përqindja mbetet shumë më e ulët.

Komisioni Evropian vlerëson se potenciali për të tërhequr punëtorë nga jashtë BE-së mbetet ende i pashfrytëzuar, sidomos për ndërmarrjet e vogla dhe të mesme, të cilat përbëjnë 99 për qind të bizneseve në Evropë.

---