Falet Kurban Bajrami, Tërnava thërret për qetësi në veri: Kjo festë na bënë bashkë të gjithëve

Naim Tërnava: Të lutemi për më shumë paqe, harmoni e qetësi në mes të njerëzve

Sot në gjithë botën myslimanët kremtojnë festën e Kurban Bajramit dhe manifestimi qendror në Kosovë, kushtuar kësaj feste, u mbajt në Xhaminë e Madhe në Prishtinë.

Namazi i Kurban Bajramit u fal në orën 5:38, nën prirjen e kryeimamit të Prishtinës, Burhanudin ef. Hashani, ndërsa hytben – mesazhin e Kurban Bajramit ka mbajtur Myftiu i Kosovës, Naim eTërnava, i cili, duke u lutur që të mbretërojë paqja, harmonia, solidariteti te njrerëzit, përmendi edhe elemente negative në shoqërinë tonë dhe gjetkë, duke përmendur dhunën në familje, siç u shpreh ai, celula e shoqërisë, pastaj përdorimi i alkoolit, përfitimi i pandershëm etj. Ndërkaq për sigurinë në vend, më konkretisht në veri të vendit, myftiu Tërnava tha se gjendja nuk është e mirë dhe apeloi që në vend të dhunës të ketë dialog për daljen nga kriza e tanishme.

Myftiu foli edhe për gjendjen e sigurisë, duke kërkuar shtensionim të situatës. Ai ka kërkuar që Qeveria e institucionet ndërkombëtare të punojnë në këtë drejtim.

“Të nderuar vëllezër dhe motra, kjo festë është edhe shoqërore, ndaj përkushtimi për shoqërinë është obligim i fesë islame, ashtuqë askush të mos ndihet i privuar nga të mirat materiale, prandaj të qëndrojmë të solidarizuar dhe në harmoni me njëri-tjetrin”.

“Veprat e këqija janë ato që e cenojnë fenë islame, dhuna e çdo lloji, tradhtia bashkëshortore, bixhozi, alkooli, të gjitha këto janë pothuajse të njëjta”.

Edhe qytetarët patën me mesazhe për paqe, solidaritet, harmoni dhe dashuri ndaj njëri-tjetrit.

---