Fenerbahçe nis garën për Fisnik Asllanin, a do ta rrëmbejë nga Europa?

(KEYSTONE/DPA/Soeren Stache)

Klubi turk Fenerbahçe po intensifikon përpjekjet për të sjellë në radhët e veta sulmuesin kosovar Fisnik Asllani, aktualisht pjesë e skuadrës gjermane Hoffenheim.

Sipas mediave sportive, drejtuesit e klubit nga Stambolli janë seriozisht të interesuar për të transferuar 23-vjeçarin gjatë afatit kalimtar veror, me synim forcimin e sulmit për sezonin e ardhshëm.

Raportimet e fundit tregojnë se edhe klube si Chelsea dhe disa të tjera nga Liga Premier, si dhe ekipe të ndryshme evropiane, po monitorojnë nga afër Asllanin, duke e bërë këtë transferim një objektiv të rëndësishëm në treg.

Megjithatë, Fenerbahçe synon të jetë konkurrent serioz dhe të bindë Hoffenheim për ta blerë lojtarin. Klubi gjerman kërkon rreth 30 milionë euro, një shifër që reflekton performancën premtuese të Asllanit këtë sezon dhe interesimin e klubeve të mëdha për të.

23-vjeçari ka qenë ndër lojtarët më të dalluar të Hoffenheim këtë sezon, duke realizuar 9 gola dhe 8 asistime në 26 paraqitje në të gjitha kompeticionet.