Feride Rushiti prezanton në Berlin përvojën e Kosovës në mbështetjen e të mbijetuarve të dhunës seksuale gjatë luftës

Paneli ndërkombëtar mblodhi ekspertë nga Kosova, Ukraina dhe Bosnjë e Hercegovina për të diskutuar sfidat e drejtësisë dhe rehabilitimit të viktimave

Në Berlin u mbajt një diskutim ndërkombëtar kushtuar dhunës seksuale gjatë konflikteve dhe mbështetjes së të mbijetuarve, ku u prezantuan përvojat e Kosovës, Ukrainës dhe Bosnjë e Hercegovinës, transmeton albinfo.ch.

Ngjarja u organizua nga Fondacioni Heinrich Böll dhe mblodhi një numër të madh pjesëmarrësish, si në sallë ashtu edhe online. Në panel morën pjesë Dr. Feride Rushiti nga Kosova, Lina Kushch nga Ukraina dhe Ajna Mahmić Ćatić nga Bosnjë e Hercegovina.

Diskutimi u fokusua në njohjen ligjore të viktimave, stigmën shoqërore, drejtësinë tranzicionale, vullnetin politik dhe sfidat e rehabilitimit të të mbijetuarve të dhunës seksuale të lidhur me luftën.

Duke prezantuar përvojën e Kosovës, Dr. Feride Rushiti theksoi se pengesa më e madhe për njohjen e të mbijetuarve ka qenë heshtja e shkaktuar nga stigma, frika dhe mungesa e mbështetjes institucionale.

Ajo nënvizoi se njohja ligjore e viktimave në Kosovë është arritur falë këmbënguljes dhe qëndrueshmërisë së vetë të mbijetuarve, ndërsa theksoi se rehabilitimi duhet të jetë gjithëpërfshirës, duke kombinuar mbështetjen psikosociale, fuqizimin ekonomik dhe promovimin e dinjitetit në vend të stigmatizimit.

Panelistet nga Ukraina dhe Bosnjë e Hercegovina ndanë gjithashtu sfidat me të cilat përballen viktimat në vendet e tyre, duke theksuar nevojën për qasje më të forta ligjore, mbështetje institucionale dhe mbrojtje afatgjatë për të mbijetuarit.

Ngjarja shërbeu si një platformë e rëndësishme për shkëmbimin e përvojave dhe për forcimin e dialogut ndërkombëtar mbi të drejtat, drejtësinë dhe dinjitetin e viktimave të dhunës seksuale gjatë konflikteve. /Albinfo.ch

---