Ferizaj me Plan Veprimi për të përballuar ardhjen e mërgimtarëve

Aliu kërkoi nga përfaqësuesit e Policisë së Kosovës të hartojnë një Plan Veprimi për trafik si përgatitje për të përballuar ardhjen e mërgimtarëve si dhe plan kontrolli për shmangien e aksidenteve fatale

Kryetari i Komunës së Ferizajt, Agim Aliu ka mbajtur mbledhjen e dytë me anëtarët e Këshillit Komunal për Siguri në Bashkësi.

Aliu kërkoi nga përfaqësuesit e Policisë së Kosovës të hartojnë një Plan Veprimi për trafik si përgatitje për të përballuar ardhjen e mërgimtarëve si dhe plan kontrolli për shmangien e aksidenteve fatale, me ç’rast do të rezultonte me rritjen e kontrollit në kafiteri të ndryshme, testeve të alkoolit për vozitësit si dhe masa të tjera që kanë të bëjnë me sigurinë në trafik, përcjell albinfo.ch.

Edhe në fushën e arsimit nga të pranishmit u shfaqën propozime të ndryshme që do të rrisnin sigurinë në shkolla.

Gjithashtu Aliu njoftoi se me qëllim rritjen e sigurisë së nxënësve dhe ekonomizimin e shpenzimeve të maturës për familjet që kanë fëmijët e tyre maturantë, ka marr vendim që këtë vit mbrëmja e maturës të organizohet dhe mbahet në objekte hoteliere në territorin e Ferizajt, dhe jo siç ka qenë praktikë e deritanishme të mbahet edhe në qytete të tjera të vendit.