FSK-ja pajiset me autoblinda të reja nga SHBA-ja, rriten kapacitetet mbrojtëse të Kosovës

FSK-ja merr 50 autoblinda nga SHBA-ja

Forca e Sigurisë së Kosovës është furnizuar me autoblinda të reja, të blera në Shtetet e Bashkuara të Amerikës, si pjesë e përpjekjeve për fuqizimin e kapaciteteve mbrojtëse të vendit, përcjell albinfo.ch.

Kryeministri në detyrë, Albin Kurti, e cilësoi këtë furnizim si një dëshmi të re të partneritetit të palëkundur me SHBA-në, ndërsa theksoi se ushtria e Kosovës do të vazhdojë të zhvillohet sipas modelit amerikan, si në trajnime ashtu edhe në doktrinë ushtarake.

Ministri në detyrë i Mbrojtjes, Ejup Maqedonci, u shpreh se FSK-ja po përparon me ritme dinamike, duke u pajisur me teknologji dhe mjete të avancuara që mundësojnë përmbushjen e misionit kushtetues. Ai tha se transformimi i FSK-së në një forcë profesionale nuk do të ishte i mundur pa mbështetjen e SHBA-së, të cilën e quajti partner strategjik dhe të pazëvendësueshëm. Maqedonci konfirmoi gjithashtu përkushtimin e Kosovës për të pasur sisteme armatimi të përputhshme me standardet e NATO-s.

Kosova nuk ka bërë të ditur numrin e autoblindave të reja, por vendi ka qenë vazhdimisht aktiv në blerjen e pajisjeve ushtarake nga SHBA-ja. Përveç furnizimeve të mëparshme me automjete të tipit Humvee dhe ASV, vitin e kaluar Kosova kërkoi blerjen e 200 raketave kundërajrore Javelin dhe është në proces të pagesës. Buxheti i mbrojtjes për këtë vit është rritur në 207.8 milionë euro, ndërsa transformimi i FSK-së në ushtri të plotë është planifikuar të përfundojë brenda një dekade nga nisja e tij në vitin 2018.

---