GAP e konsideron të padrejtë pagesën e policave të sigurimit për mërgimtarët

Sipas këtij raporti, kjo praktikë është e padrejtë

Në një raport të publikuar nga Instituti GAP në Kosovë, pagesa e sigurimeve kufitare nga buxheti i Kosovës për mërgimtarët po shohet si praktikë jo e mirë.

Sipas këtij raporti, kjo praktikë është e padrejtë.

“Pagesa e polisave kufitare nga buxheti i shtetit nuk do duhet të shërbejë si praktikë edhe në vitet e ardhshme. Kjo për faktin se është një shpërndarje e padrejtë e taksave të qytetarëve, duke subvencionuar një kategori të popullsisë në gjendje të mirë financiare”, thuhet në raport, transmeton Albinfo.ch.

GAP konsideron se në periudhë afatshkurtër, Qeveria e Kosovës, Banka Qendrore dhe Byroja Kosovare e Sigurimit duhet t’ua mundësojnë pjesëtarëve të mërgatës dhe të huajve që hyjnë në vendin tonë, që polisat kufitare t’i paguajnë në mënyrë elektronike (online) me qëllim të shkurtimit të kohës për pritjet në kufi.

“Në aspekt afatgjatë, institucionet duhet të sigurohen që numri i veturave të paregjistruara dhe në qarkullim të ulet nga 30 për qind në 5 për qind dhe kësisoj, të largohet edhe pengesa praktike për aplikim për anëtarësim në Kartonin e Gjelbër”, vazhdon tutje raporti.

---