Gjenden të vrarë 5 anëtarë të një familjeje, në Berlin

Policia ka gjetur pesë të vdekur nga të shtënat me armë zjarri dhe me plagë të shkaktuara me thikë në një ndërtesë banimi, afër Berlinit

Të shtunën, policia ka gjetur pesë të vdekur – dy të rritur dhe tre fëmijë – në një ndërtesë banimi në jug të Berlinit. Sipas të dhënave të para, bëhet fjalë për një krim të dhunshëm.

Trupat – dy të rritur dhe tre fëmijë – kanë plagë me armë zjarri dhe thikë, sipas prokurorisë së Cottbus-it. Kështu është shprehur kryeprokurori Gernot Bantleon të shtunën, shkruan dpa.de.

Tre fëmijët janë katër, tetë dhe dhjetë vjeç ndërsa dy të rriturit janë 40 vjeç.

Menjëherë kanë nisur hetimet penale, të cilat kanë vazhduar edhe pasdite, transmeton albinfo.ch. Përveç teknikëve të mjekësisë ligjore, në vendngjarje ka qenë edhe eksperti i Institutit për Mjekësi Ligjore të Brandenburgut, ka thënë prokurori i përmendur.

Siç raporton një nëpunëse policore, ajo kishte marrë një telefonatë pak minuta para mesditës. Telefonuesit e konsideronin të pazakontë që nuk po i shihnn askund banorët e shtëpisë në lagjen Senzig.

Në njoftimin për shtyp thuhet se dëshmitarët kishin parë njerëz të pajetë në shtëpinë e familjes. Më pas, zyrtarët i kanë gjetur të vdekur pesë banorët e shtëpisë, anëtarë të një familjeje.

Sipas informatave që japin disa media gjermane, familja ndodhej në karantinë për shkak të koronavirusit.

---