Gjermania nënshkruan marrëveshje për energjinë me Kanadanë

pixabay

Gjermania dhe Kanadaja nënshkruan një marrëveshje bashkëpunimi për prodhimin dhe transportin e hidrogjenit në ditën e dytë të udhëtimit të parë të kancelarit gjerman Olaf Scholz në Kanada.

Ministri gjerman i Ekonomisë, Robert Habeck, dhe ministri kanadez i Energjisë, Jonathan Wilkinson, nënshkruan marrëveshjen gjatë një ceremonie në qytetin e largët të Stephenville, Newfoundland dhe Labrador, në prani të Scholz dhe kryeministrit kanadez, Justin Trudeau.

Trudeau foli për “një hap historik përpara për të ardhmen tonë të përbashkët”.

“Qëllimi ynë është i qartë: të punojmë për eksportet e para kanadeze të hidrogjenit në Gjermani deri në vitin 2025. Rezultatet tona janë gjithashtu të qarta: krijimi i vendeve të punës në klasën e mesme dhe rritja lokale duke ofruar energji të qartë që do të ndihmojë në luftimin e ndryshimeve klimatike”, tha Trudeau.

Kancelari Scholz tha se ‘’marrëveshja do ta çojë partneritetin midis dy vendeve në një nivel më strategjik’’.

Kancelari gjerman, i shoqëruar në udhëtimin e tij nga zëvendësi Habeck dhe një delegacion i madh liderësh nga bota e biznesit dhe industrisë, e quajti marrëveshjen “një hap të rëndësishëm jo vetëm për të forcuar marrëdhëniet tona ekonomike dypalëshe, por edhe për një furnizim me energji të qëndrueshme për të ardhmen”.

Newfoundland konsiderohet një vend i favorshëm për prodhimin e hidrogjenit të rinovueshëm. Përdorimi i hidrogjenit nuk prodhon gazra serë. Për ta prodhuar atë, uji duhet të shndërrohet në hidrogjen dhe oksigjen me anë të elektrolizës, e cila është miqësore me klimën vetëm nëse përdoret energji e qëndrueshme.

Aktualisht kostoja e prodhimit të hidrogjenit me karbon të ulët është më e shtrenjtë se blerja e gazit natyror, por ekspertët besojnë se hidrogjeni ka aftësinë të reduktojë faturat e energjisë në afat të mesëm./Dpa