Gjermania padit Italinë në Hagë për Luftën e Dytë Botërore

pixabay

Gjermania ka ngritur një çështje kundër Italisë në Gjykatën Ndërkombëtare të Drejtësisë në lidhje me pretendimet për kompensim nga krimet e luftës në kohën naziste.

Berlini thotë se Italia vazhdon të lejojë ngritjen e pretendimeve të tilla në gjykatat e saj, pavarësisht një vendimi të vitit 2012, ku çështje të tilla konsiderohen të papranueshme.

Që prej këtij vendimi, mbi 25 çështje për kompensim janë ngritur në gjykatat italiane. Për disa prej tyre, gjykata ka vendosur se Gjermania duhet të paguajë dëmshpërblim.

Gjermania ka ngritur këtë shqetësim në Hagë për shkak të dy çështjeve që janë në proces, që mund të çojë në sekuestrimin e disa pronave të saj në Romë.

Një gjykatë në Itali do të vendosë më 25 maj nëse do të detyrojë shitjen e këtyre pronave, ku përfshihen shtëpi kulturore gjermane, historike dhe institucione edukimi.

Mosmarrëveshja mes dy vendeve daton prej vitit 2007, kur një gjykata e lartë në Itali vendosi se Gjermania duhet të paguajë 1 milion euro të afërmve të 9 personave të vrarë nga forcat gjermane në Toskanë më 1944.

Gjermania pretendon se u ka paguar miliarda euro dëmshpërblim vendeve të dëmtuara nga Lufta e Dytë Botërore që prej përfundimit të konfliktit më 1945.

Në vendimin e 2012-ës, një gjykatë italiane përcaktoi se pretendimet të tilla për kompensim “shkelin detyrimin e saj për të respektuar imunitetin që Gjermania ka nga ligji ndërkombëtar”.

Gjykatës së Hagës mund t’i nevojiten disa vjet për shqyrtimin e kësaj çështjeje, por Gjermania kërkon që gjykata të marrë masa për të ndaluar ankandet në Itali për shitjen e pronave të saj.

Gjykata Ndërkombëtare e Drejtësisë gjendet në Holandë dhe është pjesë e OKB-së. Qëllimi kryesor i saj është që të zgjidhë mosmarrëveshje ligjore mes shteteve./BBC