Gjykata Supreme refuzon ankesën e LVV-së për qendrat e votimit jashtë Kosovës

Kolegji i Gjykatës Supreme ka refuzuar si të pabazuar ankesën e Lëvizjes Vetëvendosje (LVV) lidhur me vendimin e Panelit Zgjedhor për Ankesa dhe Parashtresa (PZAP) që ndalon votimin në qendrat e votimit jashtë Kosovës, të identifikuara përmes përfaqësive diplomatike.

Sipas njoftimit të Gjykatës Supreme, vendimi i PZAP-së i datës 30 nëntor 2025 është i drejtë dhe i ligjshëm. Paneli kishte vendosur që për zgjedhjet e parakohshme për Kuvendin e Republikës së Kosovës, që do të mbahen më 28 dhjetor 2025, qendrat e votimit jashtë vendit të jenë përfaqësitë diplomatike ose hapësirat e tyre.

“Lejimi i qendrave të votimit vetëm brenda përfaqësive diplomatike është një masë mbrojtëse për të garantuar integritetin e votës dhe nuk pengon të drejtën e votës së qytetarëve që jetojnë jashtë vendit,” thuhet në komunikatën e Gjykatës Supreme.

Gjykata gjithashtu thekson se Republika e Kosovës ka garantuar të drejtën e votës për qytetarët jashtë vendit, duke vendosur edhe kushtet ligjore për ushtrimin e saj. LVV kishte dorëzuar ankesën më 3 dhjetor 2025, duke kundërshtuar vendimin e PZAP-së.