Gratë e Zvicrës sot kanë “Ditën e aksioneve”

Përmes aksioneve që zhvillojnë sot, gratë e Zvicrës dëshirojnë të sensibilizojnë opinionin për mospërmbushjen e plotë të barazisë gjinore

Sot shënohet në Zvicër Dita e Gruas. Bëhet fjalë për një eveniment specifik për Zvicrën, i cili organizohet më çdo 14 qershor, në shënim të grevës që e kishin organizuar gratë më 14 qershor të vitit 1991 për të kërkuar të drejtat e tyre.

Kështu, përmes aksioneve të ndryshme që zhvillojnë gjatë kësaj dite, gratë e Zvicrës dëshirojnë të sensibilizojnë opinionin për mospërmbushjen e plotë të barazisë gjinore në këtë vend.

Edhe sot, 20 vite pas grevës, gratë paguhen mesatarisht 20 për qind më pak se burrat, me gjithë faktin se në kushtetutë barazia e pagës është futur që prej 30 vitesh, përkujtojnë organizueset e Ditës së Gruas.

Ndërkaq, sipas ekspertëve, gjysma e dallimit në rroga, në favor të meshkujve vjen nga shkalla më e lartë e arsimimit të tyre, nga numri më i madh i viteve të punës dhe nga pozitat më të larta të tyre. Por, gjysma tjetër e dallimit (10%) ka të bëjë me siguri me diskriminimin.

Sot, rreth 59 organizata, parti dhe sindikata kanë shpallur ditën e aksioneve kundër diskrimi8nimit të gruas. Me moton “Kujdes, gratë po nisen” kanë filluar sot aktivitete të ndryshme. Në Bernë mbahet manifestimi qendror.